Aẓayer aneɣdim n CNAS

CNAS d tasuddut tanagdudt n usefrek ulmis yewwin udem anezrif akked timanit n tedrimt, akken daɣ i tettwassen « d tanazut » deg wassaɣen-is akked yikriden.

Amagrad 49 n (usaḍuf u°88-01 n 12 yennayer 1988).

Isefkan n CNAS

• Adelles n yimeẓla tinsekkidin tinmettiyin (aṭṭan, tarrawt, akraf, tamettant, AT/MP) ;
• Asefrek n tnekcitin n twacult ɣef leḥsab n Uwanek ;
• Asenkid n ureṭṭal, tasweḍt akked ccwal deg ureṭṭal n tebzar n teɣlist tanmettit yeɛnan asedrem n yimeẓla-ynes.
• Tukci n wuṭṭun n uklas aɣelnaw i yimsenkiden inmettiyen akked yimuras.
• Aɛiwen i usnerni n tsertit n uḥezzeb n « AT/MP » d usefrek n tedrimt n useḥbiber « AT/MP »
• Asefrek n yimeẓla i staḥqen imdanen yesfaydin s yimtuwa isindisanen n teɣlist tanmettit.
• Asluɣmu n tesweḍt tanujjit n yimesfaydiyen ;
• Armas n tigawin iwakken ad sfaydin ixeddamen d yinezraf-nsen s yimeẓliwen timesduklanin deg wayen yeɛnan tazmert d tmetti ;
• Asefrek n tedrimt n lemɛawna d usɣal ;
• Astenyi n yimtuwa akked yimeẓla n usejji ;
• Asenked n yisalli n yimesfaydin d yimarisen.

Tuddsa n CNAS

• Yettuselwa s useqqamu n tedbelt
• Yudeg ddaw n tmaddirt n teɣlift n uxeddim, n usemres akked teɣlist tanmettit.
• Tesɛa tazmert taɣelnawt akken daɣ i tla tiserqas tilemmasin d tdiganin (11 n timehliwin akked 5 n tebniqin deg tesga n tmehla tamatut akked 49 n tneggiwin n lwilaya).

Taɣessa n CNA

Akken ad tessiweḍ ɣer yiswan-is, CNAS tesɛa :

• Tanmehla tamatut i d-yezgan deg Ben Ɛeknun,
• 49 n tneggiwin n lwilayat (gar-asent snat deg Lezzayer),
• 826 n tɣessiwin n lexlas yettwazzuzren ɣef wakal n tmurt,
• 4 n tesnujyin tuzzigin ;
• 2 n wammasen n teɣdawalt
• Yiwen uɣerbaz i yimeɛḍar
• 4 n wammasen imnaḍiyen n Usignew anejjay (Qsenṭina, Jijel, Leɣwaṭ d Tlemsan).
• 33 n wammasen n umnined, n tujjya akked usferfed azikan ,
• 49 n tneggiwin tinsafarin ,
• 30 n tekricin d yifragen n Yigerdan;
• Yiwet n tsaswart deg Qsenṭina ;
• Yiwen n wammas anmetti n twaculin deg Benɛeknun ;
• Yiwen n umeẓdu anmerri deg Melbou (Bgayet).

Asenkid anmetti

1. Imesfaydiyen

1. Imsenked
2. Imawlan n yizerfan

1. Timijwin yemgaraden

1. Aṭṭanen
2. Tarbayt
3. Timeɛdert
4. Tamettant

Imesfaydiyen

1. Imsenked anmetti

* s yisem n tuget n yimeẓla, am :

7. Imeẓla s tedrimt n waṭṭan
8. Imeẓla s tedrimt n terbayt
9. Lexlaṣ n wussan n waṭṭan
10. Lexlaṣ n wussan n terbayt
11. Apansyun n timeɛdert
12. Ihri n tmettant

* s yisem n yimeẓla s tedrimt kan :

– PN aṭṭan ;

– PN tarbayt ;

– Taggayin di ddemma n wid ur nxeddem ;

– Inelmaden ;

– Imjuhad d yiseflan n ṭrad n uslelli aɣelnaw ;

– Imeɛduren ;

– Imesfaydiyen n yipunsyunen ɛla ḥsab n umagrad 8 n usaḍuf 94/91 n 10.04.94 ;

– Iḥemmalen yesɛan tesriḥ di tmersiwin ;

– Iɛessasen n yineɣsaren war lexlaṣ yesɛan tesriḥ ;

– Imesfaydiyen s lexlaṣ i uxeddim i lfayda n lɛamma ;

– Asenkid awizi.

1. Imawlan n yizerfan (amagrad 67 asaḍuf 83/11) :

Imawlan n yizerfan n yimsenked anmetti sfaydayen-d s yimeẓla-agi :

• Isenkiden n waṭṭan akked terbayt i tmeṭṭut ;
• Asenkid n waṭṭan i yigerdan d yimawlan yella ɣef yiri n imsenked

• Imawlan n yizerfan d wigi :

• Tameṭṭut n yimsenked ma yella nettat yakan ur tesɛi ara asenkid s yiman-is.
• Igerdan yellan ɣef yiri n yimsenked ɛla ḥsab n lqanun n teɣlist tanmettit (igerdan leḥlal, igerdan d-yettwajemɛen, igerdan n lkafala) :
• Ur yewwiḍen ara 18 iseggasen di leɛmer-nsen ;
• Ur nɛeddi ara 25 iseggasen ilemden lḥirfa ;
• Ur yewwiḍen ara 21 iseggasen i yinelmaden. Ma yella yehlek, leɛmer ur yettwaḥsab ara alama yeḥla ;
• Tiḥdayin yellan ɣef yiri ayen bɣunt sɛant di leɛmer-nsent ;
• I yimeɛdar ayen bɛun sɛant di leɛmer-nsen.

1. Timijwin yemgaraden

1. Asenkid n waṭṭan

III. Asenkid n terbayt

1. Asenkid n timeɛdert
2. Asenkid n tmettant

1. Asenkid n waṭṭan :

Imeẓla s tedrimt : (amagrad 8 – asaḍuf 83/11)

Tabadut :

Imeẓla s tedrimt yella deg-sen umeṣruf n :

• Usejji ;
• Teftekt ;
• Isufar n usejji, ddwa ;
• Unekcum ɣer sbiṭar ;
• Radyiwat d tesleḍt ;
• Usejji n tuɣmas d uɛiwed-nsent ;
• Usizdeg di lḥemmamat ;
• Les prothèses ;
• Usejji n yiɣsan ;
• Uɛiwed n usegmi n tikli ;
• Usiweḍ n umuḍin ;
• Imeẓla yerzan tawacult ;
• Usiweḍ n imsenked d yimawlan n yizerfan ɣer usenqed asjyan ;
• Uḥbas n tadist ;

Imeẓla s tedrimt ur sɛina ara tilist deg wakud skud imsenked yesɛa izerfan-is inmetiyen.

Tifadiwin n tullya n yizerfan : (amagrad 52- asaḍuf 83/11)

I yimeẓla s tedrimt n usenkid n waṭṭan :

Tafada n tanzagt n umahil :

Imsenked ilaq ad yili yexdem xerṣum :

• 15 n wussan neɣ 100 n tsaɛtin di tlata n wagguren deg 12 n wagguren uqbel azemz n usejji i isuter ad iɣrem ;
• Neɣ 60 n wussan neɣ 400 n tsaɛtin di 12 n wagguren uqbel azemz n usejji i isuter ad iɣrem ;

Tafada tamatut :

Imsenked ilaq ad yili d imsenked anmetti ɣer uzemz n beddu n usejji ;

Ma yella-d uḥbas ɣef uxeddim, azref n imeẓla s tedrimt ad yeqqim :

Azal n 3 n wagguren, ma yella imsenked yexdem xerṣum 30 n wussan neɣ 200 n tsaɛtin deg useggas nni uqbel aḥbas-ines ɣef uxeddim ;

Azal n 6 n wagguren, ma yella imsenked yexdem xerṣum 60 n wussan neɣ 400 n tsaɛtin deg useggas nni uqbel aḥbas-ines ɣef uxeddim ;

Azal n 12 n wagguren, ma yella imsenked yexdem xerṣum 120 n wussan neɣ 800 n tsaɛtin deg useggas nni uqbel aḥbas-ines ɣef uxeddim.

Azal n uɣram : (amagrad 59 – asaḍuf 83/11 akked amagrad 5 – asaḍuf 84/87)

S umata, ssuma n tujjya akked isafraen n tujjya yettxelliṣ-iten imsenked, yetteɣram-iten ufniq s wazal n 80% n ssuma tunṣibt n uɣram.

Azal-agi d yiwen-is i tujjya di lḥemmamat akken yebɣu yili.

D acu kan azal-agi yezmer ad yaweḍ ɣer 100% di tegnatin-agi :

Ticki idrimen yettuṣerfen kecmen di lejrida tunṣibt s wazal n K50 neɣ ugar.

« Mi ara yili umesfaydi, s ccwer n usenqed ujjyan, yettiki di 16 n waṭṭanen imezgan (amagrad 21 n usaḍuf 84/27 n 11 furar 1984) neɣ di 10 n waṭṭanen d-yeddan deg umagrad 5 n usaḍuf-agi ;

Mi ara yilin yedrimen ttuṣerfen di tikci n yidammen neɣ n yisufard-icudden ɣer wannect-a ;

I usersi n llufanat d-ilulen uqbel lawan di tezdelt (couveuse) ;

I usekcem ɣer sbiṭar ugar n 30 n wussan ;

Seg wass amezwaru n waggur wis 4 n uḥbas ɣef uxeddim mi ara tili tujjya teḥdaǧ aḥbas ɣef uxeddim ugar n 3 n wagguren ;

Mi ara yili ayen yettuṣerfen yeɛna :

• Timacinin timeqranin ;
• Ayen yeɛnan tujjya n uɣesmar ;
• Aɛiwed n usegmu ;
• Aɛiwed n userwes amsadur.

Aɣram yettili-d ɛla ḥsab n tferḍa (ordonnace) deg aydeg ara naf :

• Isem n umejjay ;
• Isem n umuḍin ;
• Isufar n tujjya ;
• Tazmelt n umejjay ;
• Ssuma n yal asfar akked uɣrud (total) n tferḍa sɣur afarmasyan

Imeẓla s tedrimt taḥerfit (en espèces) :

a.2.1. Tabadut : Imeẓla s tedrimt taḥerfit d aɣram n tjernaṭ n imsenked anmetti mi ara yili yeḥbes ɣef uxeddim ɣef ssebba n waṭṭan.

Tifadiwin n tullya n yizerfan :

Tafada n tanzagt n uxeddim : iwakken ad yili uzref i lexlaṣ n tjernaḍin n usenkid n waṭṭan, imsenked ilaq ad yili yexdem yakan :

I 6 n wagguren imezwura n uḥbas ɣef uxeddim : (amagrad 52 – asaḍuf 82/11)

Xerṣum 15 n wussan neɣ 100 n tsaɛtin di 3 n wagguren seld azemz n uḥbas ɣef uxeddim ;

Xerṣum 60 n wussan neɣ 400 n tsaɛtin di 12 n wagguren seld azemz n uḥbas ɣef uxeddim ;

Mi ara d-yili uḥbas ɣef ux’eddim ugar n 6 n wagguren : (amagrad 56 – asaḍuf 83/11)

Xerṣum 60 n wussan neɣ 400 n tsaɛtin di 1 n wagguren seld azemz n uḥbas ɣef uxeddim ;

Xerṣum 180 n wussan neɣ 1200 n tsaɛtin di 3 n yiseggasen seld azemz n uḥbas ɣef uxeddim ;

Azal n yimeẓla : (amagrad 14 – asaḍuf 83/11 neɣ 84/27)

Imeẓla s tedrimt taḥerfit ttwafkan i yimsenked am akken d tijernaḍin seg wass amezwaru n wartazmert i uxeddim :

Azal n 50% n tjernaṭ n yiwen wass seld tukksa n tebzert n tɣellist tanmettit d leɣrama seg wass amezwaru ɣer 15 n wussan n uḥbas ɣef uxeddim ;

Azal n 100% n tjernaṭ n yiwen wass seld tukksa n tebzert n tɣellist tanmettit d leɣrama seg wass wis 15 n uḥbas ɣef uxeddim ;

Azal n 100% n tjernaṭ n yiwen wass seld tukksa n tebzert n tɣellist tanmettit d leɣrama seg wass amezwaru n uḥbas ɣef uxeddim ;

• Ma yella waṭṭan d uɛḍil (amagrad 21 n usaḍuf 84/27 n 11.02.1984) ;
• Ma yella-d unekcum ɣer sbiṭar xas uqbel ass wis 15.
• G.M. : ussan war tajernaṭ yettwaqeblen sɣur amejjay am akken d ussan n usteɛfu ttwaḥsaben amzun akken d ussan n uxeddim.

Tisawḍiwin (délais) n tseɣerut n uḥbas ɣef uxeddim (asaḍuf n 13.02.1984 akked lqanun n tɣellist tanmettit uṭṭun II.10.1991)

Yal aḥbas ɣef uxeddim ilaq bab-is ad d-iberreḥ yis deg sin n wussan seld aḥbas ɣef uxeddim.

Ma yella uberreḥ yella-d s ttawil n lbusṭa, azemz n lbusṭa ad yili d inigi.

Taseɣrut-agi tezmer ad tennejbad alamma n 7 n wussan ma yella ittafttaren ttwasersen sɣur imceyyeɛ n yixeddamen ɣer ufniq.

Timariwin n umuḍin d-yesfaydin s uḥbas ɣef uxeddim :

Amuḍin d-yesfaydin s uḥbas ɣef uxeddim :

• Ur ilaq ad yexdem ayen nniḍen yerna ad ittuxellaṣ fell-as ḥala ma yewwi-d tesriḥ sɣur afniq ;
• Ur ilaq ad yeffeɣ axxam-is ḥala ma d amejjay is-d-yessutren annecten. Ma yella akken, tuffɣa-ines ilaq ad d-tili gar 10h ar 16h ;
• Ur ilaq ara ad yinig war tesriḥ n ufniq neɣ asuter n umejjay i ḥellu-ines ;
• Ilaq ad iseɛlem tanegga ines ma yella yehlek berra n temdint-ines ;
• Ad iseɛlem amejjay-ines ma yella yebɣa ad yessnejbad aḥbas ines ɣef uxeddim.

Ma yella imsenked ur iquder ara timariwin-agi, ur ittuxellaṣ ara di tallit n uḥbas ɣef uxeddim.

Asenqed n yimsenkiden : (amagrad 64 – asaḍuf 83/11)

Yezmer ufniq ad yeɣtes ad iwelleh imsenkiden ɣer :

Ukayaḍ ujjyan

Usenqed ujjyan

Ma yella imsenked yugi ad d-yerr i wayen d-yessuter seg-s ufniq, ad isruḥ izerfan-is ɣer imeẓla.

2. Asenked n terbayt

• Tabadut :

Iswi n usenked n terbayt d aḥareb ɣef tmeṭṭut yellan s tadist, ɣef tyemmat akked llufan. Ad naf deg-s :

Imeẓla s tedrimt : i umeṣruf n tadist, n terbayt d wayen d-itebɛen ;

Imeẓla s tedrimt teḥerfit : aɣram n tjernaṭ di tallit nni n uḥbas ɣef uxeddim ɣef ssebba n terbayt.

• Tifadiwin n tullya n yizerfan :

Xerṣum 15 n wussan neɣ 100 n tsaɛtin uqbel azemz n twalit tujjyant tamezwarut n tadist ;

Xerṣum 60 n wussan neɣ 400 n tsaɛtin uqbel azemz n twalit tujjyant tamezwarut n tadist ;

Nnig n wayen akka d-yettwabedren s ufella, amsenkid ur ilaq ara ad yeḥbes ɣef uxeddim ɣef ssebba nniḍen yexḍan tarbayt di tallit d-yezgan gar wazemz n twalit tujjyant tamezwarut n tadist akked terbayt.

Tifadiwin tujjyanin :

Tarbayt ilaq ad tili ɣef ufus n umejjay neɣ n lqibla neɣ afremli yesɛan azref ad yexdem ccɣel-nni, ḥala ma terra tmara.

Ilaq afniq ad yeɛlem s tadist xerṣum 6 n wagguren uqbel tarbayt.

Tameṭṭut yellan s tadist ilaq ad texdem ikayaden ujjyanen uqbel tarbayt akked mbeɛd tarbayt :

• Akayad akliniki ukmil uqbel taggara n waggur wis 3 n tadist ;
• Akayad amnifri deg waggur wis 6 n tadist ;
• Sin n yikayaden n tusnarbayt (gynécologique) : yiwen di 4 ledwar uqbel tarbayt, wayeḍ 8 ledwar mbeɛd tarbayt.

Lexlaṣ n yimeẓla : (amagrad 35 – asaḍuf 84/27 – amagrad 25 – asaḍuf 83/11)

Mi nnekmalent tfadiwin n tullya n yizerfan, imeẓla n usenked n terbayt ilaq ad ttuxellṣen seld taggara n waggur wis 6 n tadist ɣas akken llufan ur yeddir ara.

Imeẓla s tedrimt :

Yella deg-s aɣram s wazal n 100% n ssumat tiluganin n tujjya, n ssuma n terbayt akked unekcum ɣer sbiṭar.

Tigegwiyin (sanctions) : (amagrad 38 asaḍuf 84/27)

Ma yella aselkin ujjyan n tadist ur yettusers ara ɣer tnegga uqbel taggara n waggur wis tlata, u ma yella tameṭṭut nni s tadist ur tesɛedda ara ikayaden nni ujjyanen yella deg usaḍuf, imeẓla s tedrimt ad neɣsen s wazal n 20% ḥala ma tella ssebba i wannecten.

Imeẓla s tedrimt taḥerfit :

Lexlaṣ n tjernaḍin :

Tameṭṭut ixeddmen tesɛa azref ɣer uɣram n tjernaṭ ines, ma yella ilaq ad teḥbes ɣef uxeddim s sebba n tadit, s wazal n 100% n tjernaṭ ines yettikin di tebzert.

Tanzagt n lexlaṣ :

Leɣrama n tjernaḍin yettili-d ɣef tallit deg aydeg d-yella uḥbas ɣef uxeddim de gazal n 14 n ledwar yemseḍfaren.

Tallit-agi yezmer ad tebdu si 6 n ledwar uqbel azemz n terbayt yettuɛeggnen.

Ma yella tella-d terbayt uqbel azemz n terbayt yettuɛeggnen, tallit n 14 ledwar ad qiment kemmlent.

Ma yella uḥbas ɣef uxeddim yella-d uqbel 6 n ledwar, tallit n usteɛfu tettikki deg tfadiwin ma yella tebda deg azemz seg wass amezwaru n ddurt tis 6 uqbel talalit, tanzagt n yimuras n terbayt ad tesɛu 14 ledwar seg wass amezwaru n uḥbas ɣef uxeddim.

Tallitin n uḥbas ɣef uxeddim d-iḍefren imuras n terbayt ttuɣerment s wazal n 100% seg wass amezwaru n uḥbas ɣef uxeddim s ccwer n umejjay.

Asenlid n timeɛdert

Tadabut : (amagrad 40 – asaḍuf 84/27)

Yettwaḥsab d ameɛdur, imsenked anmetti yesɛan timeɛdert is-isneɣsen xerṣum azger si tezmert-is deg uxeddim neɣ deg usekcem usurdi, meḥsub it-yeǧǧan ur yezmir ara, deg uxeddim, ad d-yawi tajernaṭ yugaren azger n tjernaṭ n uxeddam am netta, deg azemz n beddu n usejji neɣ deg azemz n tifin n timeɛdert ines sɣur amejjay.

Tifadiwin n tullya n yizerfan :

Tanzagt n uxeddim yettwaḥettmen : (amagrad 56 – asaḍuf 83/11)

Iwakkan ad yesɛu azref ɣer upansyun n timeɛdert, imsenked ilaq ad yili yexdem yakan :

Xerṣum azal n 60 wussan neɣ 400 n tsaɛtin deg 12 n wagguren uqbel aḥbas ɣef uxeddim neɣ aberreḥ n umejjay s timeɛdert ines ;

Xerṣum azal n 80 wussan neɣ 1200 n tsaɛtin deg 3 n yiseggasen uqbel aḥbas ɣef uxeddim neɣ aberreḥ n umejjay s timeɛdert ines ;

Tafada tamatut : (amagrad 20 – asaḍuf 84/27)

Nnig n tfada n tenzagt n uxeddim, imsenked ilaq ad d-yawi ttbut belli yella d axeddam asmi d-yettuberreḥ s timeɛdert-ines neɣ asmi is teḍra txazabit t-yerran d ameɛdur.

Tafada n leɛmer : (amagrad 34 – asaḍuf 83/11)

Asuter n upansyun n timeɛdert ur yettwaqbal ara ma yella imsenked ur yewwiḍ ara leɛmer ara s-iserḥen ad yeffeɣ ɣer testaɣt, meḥsub 60 iseggasen.

Tafada-agi n leɛmer ur teɛni ara imsenked ur newwiḍ ara leɛmer iwakken ad yessuter tastaɣt-ines.

Ma yella yettunefk yakan upunsyun n timeɛdert i yimsenked uqbel taqtaɣt, apansyun agi ad yuɣal n testaɣt asmi ara yaweḍ leɛmer ilaqen i tneggarut-agi.

Aḥsab n liḥala n timeɛdert :

Liḥala n timeɛdert n imsenked tettwaḥsab :

Ar taggara n 3 iseggasen deg aydeg imsenked yesfaydi-d s yimeẓla ɣef sebba n lehlak imezgi ;

Ar taggara n 300 n yimeẓla yettunefken deg tallit ur nɛeddi ara 2 iseggasen ɣef sebba n lehlakat nniḍen.

Taggayin n timeɛdert : (amagrad 36 – asaḍuf 83/11)

D amejjay d-iberḥen s timeɛdert ara d-yemlen anta taggayt ɣer yettiki imsenked yesɛan tazmert i uxeddim tugar 50% :

• Taggayt 1 : amaɛdur izemren ad yexdem ;
• Taggayt 2 : amaɛdur ur nezmir ara akk ad yexdem ;
• Taggayt 3 : amaɛdur ur nezmir ara akk ad yexdem yerna ilaq-as wis tlata ara t-iɛiwnen di tudert-is n yal ass.

G.M. : aɛiwen di tudert n yal ass lmeɛna-s tanekkra, iḍes, llbus, aḥerrek, lmaka, tuffɣa.

Azal n upansyun : (amagrad 37 ɣer 39 – asaḍuf 83/11)

Ɛla ḥsab n 3 n taggayin n timeɛdert, azal n upansyum ad yili :

60% n tjernaṭ talemmast n useggas i yimeɛdar n taggayt 1 ;

80% n tjernaṭ talemmast n useggas i yimeɛdar n taggayt 2 ;

80% n tjernaṭ talemmast n useggas i yimeɛdar n taggayt 3, rnu-yas timerna imi yeḥwaǧ wis tlata ara t-iɛiwnen. Timerna-agi azal-is 40% n upansyun, ur tezmir ad tili ddaw n 120 000 dinar i useggas (asaḍuf U° 92/273 n 06.07.1994).

Azal adday n upansyun : (asaḍuf 92/273 n 06.07.1994)

Azal n upansyun n timeɛdert i useggas ur ilaq ara ad yili ddaw 75% n tjernaṭ taɣelnawt taddayt yettuḍemnen, yeɛni :

Aɛiwed n tmuɣli deg upansyun : (amagrad 44 – asaḍuf 83/11

Apansyun n timeɛdert ur yettwaḥsab ara i lebda. Yettbeddil ɛla ḥsab n ubeddel n liḥala n timeɛdert n imsenked swayes ara d-iberreḥ umejjay.

Aḥbas n upansyun : (amagrad 44 – asaḍuf 83/11)

Apansyun n timeɛdert ad yettwaḥbes ma yella amaɛdur ur yettruḥu ara ad iẓer amejjay yal mi ara s-d-yettwasuter wannect-a

Tukssa n upansyun : (amagrad 45 – asaḍuf 83/11)

Tettili-d tukksa n upansyun n timeɛdert n taggayin 2 akked 3 ar taggara n waggur deg aydeg amesfaydi yuɣal s axeddim ines.

Tiririt n upansyun n testaɣt deg umkan n upansyun n timeɛdert :

Apansyun n timeɛdert yettuɣal deg umkan-is upansyun n testaɣt mi ara yaweḍ imsenked 60 iseggasen. Azal n upansyun-agi ad yili xerṣum am win n timeɛdert umi ara yettwarnu kra ɣef tmeṭṭut yellan ɣef yiri n imsenked.

Rray n ubeddel n upansyun n timeɛdert s win n testaɣt ad yettwaddem sɣur CNR ara isɛelmen CNAS s wannect-a.

Apansyun n timeɛdert n yimawlan n uzref : (amagrad 40 asaḍuf 83/11 – amagrad 30 akked 42 asaḍuf 83/12)

Imawlan n uzref n win yesɛan apansyun n timeɛdert yemmuten zemren ad sfaydin s upansyun-agi ɛlaḥsab n tfadiwin d-yeddan deg usaḍuf.

G.M. : azday n waṭas n yipunsyunen sɣur imawlan n izerfan yesɛa tilas.

Asenkid n tmettant

Tabadut :

Tamettant n yimsenked ittekkes i yimawlan n uzref yellan ɣef yiri allalen swayes ara kemmlen tudert-nsen. Ɣef ayagi, lqanun yefka-yasen ayen umi qaren ihri n tmettant ara ten-iɛiwnen ad qablen taswiɛt si leɛḍil ad ṭṭfen apansyun.

Imesfaydiyen :

Imesfaydiyen n yihri n tmettant d imawlan n uzref n imsenked yemmuten :

Tameṭṭut n imsenked neɣ argaz n timsenkedt, xas d taxeddamt i tella ;

Igerdan yellan ɣef yiri n yimsenked yemmuten :

• Yesɛan xerṣum 18 iseggasen s umata ;
• Yesɛan xerṣum 25 iseggasen ma mazal lemmden lḥirfa ;
• Yesɛa xerṣum 21 iseggasen ma yella d inelmaden ;
• War tilas n leɛmer ma yella d tiḥdayin ;
• War tilas n leɛmer ma yella d imuḍan imezgiyen neɣ d imeɛdar.

Imawlan yellan ɣef yiri n imsenked yemmuten neɣ n tmeṭṭut-is ma yella lmedxul-nsen mecṭuḥ ;

Imawlan n uzref n umeḥbus.

Tullya n yizerfan : (amagrad 53 – asaḍuf 83/11)

Iwakken ad yizmir ad d-yesfaydi s yihri n tmettant, imsenked yessefk ad yesɛu tifadiwin-a :

– Ad yili yexdem yakan 15 n wussan neɣ 100 n tsaɛtin deg 3 wagguren uqbel tamettant-ines ;

– Ur yettaxer ara seg uxeddim deg azemz n tmettant-is.

Azal n yihri n tmettant :

Imsenkiden ixeddmen (amagrad 48 – asaḍuf 83/11)

Yettaweḍ wazal n yihri n tmettant 12 n wamuren n wazal n tjernaṭ n waggur meqqren d-yeṭṭef imsenked deg useggas uqbel tamettant-is.

Akken yebɣu yili lḥal, azal n yihri agi ur yezmir ara ad yili ddaw n 12 n wamuren n tjernaṭṭ taɣelnawt taddayt yettuḍemnen (SNMG).

Imsenkiden ur nxeddem ara : (amagrad 51 – asaḍuf 83/11)

Imawlan n yizerfan n win yesɛan apansyun n timeɛdert neɣ n testaɣt neɣ n testaɣt uqbel lawan yewwḍen xerṣum 50% n usenkid n waramras, am akken d-ttuɛeggnen s ufella, zemren ad d-sfaydin s yihri n tmettant s wazal n wayen d-yessekcam imsenked i useggas, ur yezmir ad yili ddaw n 75% n wazal n SNMG.

G.M. : Ihri n tmettant ur tḥuz ara tebzert n teqtest tanmettit neɣ leɣrama ɣef lmedxul amatu (amagrad 48 – asaḍuf 83/11).

Ihri n tmettant yettwanefk-d ɣef yiwet n tikkelt d umatu seld tamettant n yimsenked (amagrad 48 – asaḍuf 83/11).

Ma yella ṭṭuqten imawlan n uzref, ihri n tmettant ad yettwabḍu gar-asen s leɛdel (amagrad 50 – asaḍuf 83/11).

Lekwaɣeḍ ilaqen i usfaydi n yihri n tmettant :

Nnig n usuter n yihri n tmettant, imesfaydiyen ilaq ad d-sersen lekwaɣeḍ-agi :

Di yal tagnit :

– Asuter n yihri n tmettant (AS 17) ;

– Aselkin n ttbut n yimesfaydiyen ;

– Tanaga n uxeddim d tjernaṭ n yimsenked ara d-ifken ttbut d akken imsenked yella d axeddam asmi yemmut, ad d-yeddu deg-s azal n tjernaṭ d-yeṭṭef deg waggur aneggaru neɣ tanaga ara d-ibeggnen lmedxul n useggas n upansyun n timeɛdert neɣ teɣtast neɣ n teɣtast uqbel lawan ;

– Tanaga ara d-ibeggnen ma yella tamettant tella-d s tmedrit n uxeddim ;

– Takarḍa n « Ccifa » n umerḥum.

I tmeṭṭut n umerḥum neɣ i urgaz n tmerḥumt :

– Arra n tissulya neɣ n twacult.

I tarwa :

– Arra n tlalit ;

– Ttbut d akken igerdan sɛan azref ɣer lukasyun neɣ aselkin aɣurbiz neɣ aselkin ujjyan i yimuḍan iɛeddan 18 iseggasen ;

– Aselkin ujjyan i yigerdan imeɛdar neɣ imuḍan imezgiyen.

I yimawlan neɣ tiḥdayin yella ɣef yiri n umerḥum :

– Arra n tlalit ;

– Tanaga sɣur taɣiwant deg aydeg ara d-ddunt tiɣbula-nsen.

Acetki :

Yal rray d-yettwaddmen sɣur afniq ilaq ad yeɛlem yiss imsenked.

Ma yella imsenked ur yeqbil ara rray-nni, yezmer ad yecetki di tfadiwin-agi :

Acetki yeɛnan tadbelt :

Imsenked yezmer ad yaru i tesqamut n ucetki n lwilaya deg sin n wagguren ara d-iḍefren tuddma n rray-nni, s tebrat ara iruḥen s ttawil n tnezzant neɣ ara ittusersen di tmarit n tesqamut.

Ma yella rray i teddem tesqamut n lwilaya ur iqenneɛ ara imsenked, yezmer ad yessuter rray nniḍen sɣur tasqamut taɣelnawt n CNAS n Lezzayer seld sin wagguren ara d-iḍefren.

Acetki yeɛnan tujjya :

Ma yella yugi rray ujjyan, imsenked yesɛa 30 n wussan iwakken ad yaru i umejjay aɣella n tnegga iwakken ad yessuter rray wis sin.

Ma yella rray agi wis sin ur yettwaqbel ara, yezmer ad yessiweḍ tamsalt ɣer teɣdemt.

Tanzagt :

Tanzagt d tallit yesɛa imsenked neɣ imawlan n yizerfan iwakken ad ssutren imeẓla-nsen ɣer isenkiden inmettiyen.

Imeẓla-agi ur ttuxellaṣen ara ma yella ur ttwasutren ara sɣur imesfaydiyen :

Deg tenzagt n 4 iseggasen :

I yimeẓla s tedrimt n usenkid n waṭṭan, deg azemz n warra ujjyan amezwaru ;

I yimeẓla s tedrimt taḥerfit n usenkid n waṭṭan, deg azemz n uḥbas ɣef uxeddim ;

I yimeẓla n terbayt, deg azemz n terbayt ;

I yihri n tmettant, deg azemz n tmettant.

Ur tettɛedday ara tenzagt alamma yekfa wass aneggaru. Amedya, ma yella tadyant teḍra ass 10.10.2000, azref n imsenked ur yettfat ara alamma d ass n 10.10.2004.

Deg tenzagt n 5 iseggasen :

I yipansyunen n timeɛdert, deg azemz n uberreḥ s timeɛdert sɣur amejjay neɣ deg azemz n tmettant n umeɛdur.

Taznagt ur tettfat ara alamma d taggara n wass aneggaru. Amedya, ma yella tadyant teḍra ass 29.08.2000, azref n imsenked ur yettfat ara alamma d ass n 29.08.2005.

Gret tamawt d akken tanzagt tettuɛelleq ma yella imsenked neɣ imawlan n yizerfan sutren kra neɣ kra seg tnegga n lwilaya (acetki, aceyyeɛ n kra n lkaɣeḍ, atg…). Di liḥala-agi, ad d-tili tullya n tenzagt nniḍen.

Tamawt :

Tanzagt ur tettwaḥsab ara i yimuḍan n leɛqel ma yella ur sɛan ara lwali.